Min huma Nina u Doris?

Nina

Xieraq li qabel tibda taqra fuq l-avventuri ta’ dawn it-tnejn, tkun taf ftit xi ħaġa dwarhom. Nina u Doris huma żewġ għalliema fi skola remota, ġo raħal remot u għalhekk it-tnejn iħossuhom remoti iżda t-tnejn għandhom għal qalbhom it-tagħlim ta’ l-imsieken vittmi tagħhom.
Il-bużbużbużbużnannu ta’ Nina kien id-direttur ta’ l-edukazzjoni. Tistgħu timmaġinaw kemm qed immorru lura fiż-żmien. Id-direttur ta’ Nina, is-Sur Ninu Cacciattolo Demajo, kien jemmen fil-futur ta’ ulied uliedu u għalhekk iddedika ħajtu f’uffiċċju jistudja statistika kontra statistika biex jara kif se jtejjeb il-livell ta’ ħutu l-Maltin. Iżda tant ra statistiċi li beda jara kollox numri. Hekka wara ġurnata xogħol, kif imur id-dar lil martu kien ikellimha permezz tan-numri. Kemm qed inħossni minus illum Helen hi! Hekk kien jgħidilha. Għax fil-verità qatt ma seta’ jsib dik it-tweġiba għall-mistoqsija li kienet iddurlu f’moħħu kull lejl u kull nhar. U din it-tweġiba saritlu torment kbir sakemm fl-aħħar inqatgħetlu vina u sabuh fl-uffiċċju bl-istatistiċi f’idejh. Hekk minn ġenerazzjoni għall-oħra n-numri baqgħu jiġru wara l-familja Cacciattolo Demajo sakemm twieldet Nina. L-ewwel kelma li ħarġet minn fommha kienet “p” u mhux “ma” kif jagħmlu s-soltu t-tfal. Kulħadd beda jaħseb x’riedet tgħid Nina u wara ħafna tqanżiħ u qbiż Nina qalet “plus, minus, division u multiply”. Kulħadd baqa’ jħares lejha jaħsbu x’riedet tgħid biha. Kull meta kienu jtuha karta biex tpinġi xi ħaġa kienet tispiċċa tpinġi xi figura li fl-aħħar tifforma ruħha f’numru. Għalhekk ma għamlulha quċċija xejn u birkuha bħala l-istudjuża futura tal-matematika. Imma flok studjuża saret għalliema. Nina Cacciatolo Demajo għażlet il-vokazzjoni bħala triqtha għax ħasbet li flok tingħalaq f’uffiċċju bħalma għamel l-antenat tagħha, l-aħjar li tinvesti fil-futur u n-numri jibqgħu jgħixu żgur.
Fil-ħin liberu tagħha, Nina tħobb tara numru ta’ programmi fuq it-televixin speċjalment soap operas. Tempesta d’Amore, Dejjem Tiegħek Becky, Beautiful, Uomini e Donne, Ciao Darwin, Tgħanniqa, Għeruq, Arani Issa, Xarabank… u lista twila li ma tispiċċa qatt. Filfatt, Nina għandha televixin f’kull kamra tad-dar biex żgur ma titlef xejn. Nina hi mara ferriħija, bieżla u simpatika.


Doris

Il-bużbużbużbużbużbużnannu ta’ Doris kien jemmen fil-potenzjal tal-poplu Malti. Kien jara lill-ħakkiema barranin jabbużaw mill-Maltin u kien jirrabja ħafna. Mikiel, għax hekk kien jismu, kien jemmen ukoll fl-ilsien Malti u kull meta kien jisma’ ż-Żebbuġin jitkellmu kien iqajjem par widnejn daqsiex u josserva t-taħdit tagħhom sakemm wasal għall-konklużjoni li dak hu l-Malti safi u li għandu jiġġieled biex il-Maltin jiksbu l-indipendenza. Iżda Mikiel miskin kien sfortunat. Beda jaħdem biex iġib lil Napuljun hawn Malta u rnexxielu. Mikiel saħansitra ltaqa’ ma’ Napuljun di persona u ħass kburija liema bħalha. Kburija lejn l-identità tiegħu u hekk kompla jsaħħaħ il-bżonn li l-Maltin ikunu Maltin ta’ veru. Iżda meta tkeċċew il-Franċiżi, Mikiel spiċċa l-ħabs u maħqur minn ħutu l-Maltin stess. Illum, il-bużbużbużbużbużnannu ta’ Doris jinsab bilqiegħda fin-nofs ta’ rawndebawt quddiem l-arkata ta’ Ħaż-Żebbuġ, bil-ktajjen ma’ saqajh iżda bil-bandiera maġenbu. U hekk Doris Psaila Vassalli wirtet din il-kburija ta’ l-antenat tagħha u kultant anke hi tħoss il-ktajjen ma’ saqajha. Min-naħa ta’ missierha tiġi minn Mikiel u min-naħa t’ommha tiġi minn Carmelo li kien qassis kbir f’Malta. Filfatt dan il-qassis kien żewweġ lil ommha u talab lill-Mulej biex itiha frott Malti pur. Meta għamlulha l-quċċija għażlet il-maktur ħamrani li kien hemm fl-art u mill-ewwel bdiet tħoss ġibda lejn dak kollu li hu Malti. L-ewwel kelma tagħha filfatt kienet “ma”. Tgħidx kemm ferħet ommha meta semgħetha tgħidha…iżda dlonk intebħet li ma kinitx qed tirreferi għaliha. Ta’ tliet snin kienet diġà qed taqra l-poeżiji taz-ziju t’ommha u kulħadd ħaseb li din Doris kienet ser tkun studjuża ta’ l-ilsien Malti. Iżda flok tingħalaq f’uffiċċju tistudja mal-kbarat tal-Malti, Doris għażlet il-vokazzjoni għax riedet tassigura l-futur tal-Malti. U hekk daħlet tgħallem fi skola remota fejn kemm-il darba tħossha bħall-antenat tagħha Mikiel, tiġġieled għal dak li hu Malti.
Fil-ħin liberu tagħha, Doris bħal Nina wkoll tħobb tara t-televixin. L-aktar programm għal qalbha huwa Beautiful li ma titilfu qatt. Tintilef quddiem il-kaxxa u tinkwetawx, minkejja li hu bit-Taljan, Doris xorta tifhmu; anzi saħansitra tibda teqleb f’moħħha dak li qed tisma’ bit-Taljan għall-Malti.
Doris hi mara bieżla, serja iżda simpatika wkoll.

Tajjeb li tkun taf li Doris u Nina jiġu minn xulxin mill-bogħod. Iz-zija ta’ oħt il-mara taz-ziju tas-Sur Ninu Cacciatolo Demajo kienet it-terza kuġina tal-kunjata ta’ ħu l-mara ta’ Mikiel…xi ħaġa hekk…